Бернард Сыруць (народж. Міхал Сіруць; — ) — матэматык, гісторык права, філолаг, даследчык Бібліі, перакладчык, аўтар падручнікаў па матэматыцы і кніг аб добрых манерах.
Біяграфія Нарадзіўся ў 1731 годзе. Паходзіў з Гродзенскага павета Ковенскай губерні. Адукацыю Міхал распачаў у Шчучынскай піярскай школе, дзе ў шаснаццацігадовым узросце ў 1747 годзе далучыўся да ордэна піяраў і ўзяў імя Бернард.
Пасля двух гадоў навіцыяту ў Любяшове ў 1749 годзе прыняў манаскія зарокі. Пасля засваення курса філасофіі (напэўна ў Шчучыне) ён прайшоў педагагічную практыку. Наступным узроўнем прафесійнай падрыхтоўкі было вывучэнне тэалогіі, якое ў гэты час у літоўскай правінцыі адбывалася ў Воранаве і ў Вільні.
Пасля 1753 года ордэнскія ўлады адправілі Бернарда на вучобу за мяжу — у рымскі Collegium Novum (1753—1756). На зваротным шляху Сыруць спыніўся ў Вене, дзе на працягу года ён выкладаў матэматыку ў Тэрэзіянскай акадэміі.
Неўзабаве вучоны піяр зноў апынуўся на радзіме. Бернард Сыруць у віленскім Калегіуме Нобіліуме выкладаў матэматыку ў 1758/59-1761/62, 1765/66 гадах, а ў 1762/63 гадах выконваў там абавязкі рэктара.
Сыруць адначасова з навучаннем у Калегіуме Нобіліуме распачаў таксама шматгадовую працу ў Віленскім настаўніцкім прафесорыуме, на працягу дванаццаці гадоў выкладаў там піярскім кандыдатам у настаўнікі вымаўленне і матэматыку. Ён таксама ўдзельнічаў у кіраванні літоўскай правінцыяй піяраў у якасці дарадцы. Педагагічная праца спалучалася таксама з некалькімі важнымі публікацыямі ў розных галінах навукі.
У 1781 годзе Бернард Сыруць атрымаў у Вільні ступень доктара багаслоўя і абодвух правоў, а затым быў прызначаны на кафедру рымскага права ў Маральным калегіуме Галоўнай літоўскай школы, у якую была пераўтворана былая езуіцкая акадэмія ў Вільні.
Памёр у Вільні ў 1784 годзе.
Крыніцы
Літаратура Kurkowski J. Bernard Syruć (Siruć) (1731-1784). — Warszawa—Lida, 2009.
Катэгорыя:Гісторыкі права Вялікага Княства Літоўскага Катэгорыя:Філолагі Вялікага Княства Літоўскага Катэгорыя:Матэматыкі Вялікага Княства Літоўскага Катэгорыя:Перакладчыкі Вялікага Княства Літоўскага Катэгорыя:Біблеісты Вялікага Княства Літоўскага Катэгорыя:Выкладчыкі Галоўнай віленскай школы Катэгорыя:Піяры