'Masechele Caroline Ntseliseng Khaketla, nada no distrito de Berea en 1918 e finada o 13 de agosto de 2012, foi unha escritora e profesora de Lesotho. Traxectoria Fixo os estudos primarios en Liphiring e Siloe, no distrito de Mohale's Hoek, rematando cun pase excepcional de primeira clase. Entre 1933 e 1935 estudou en Morija, converténdose na primeira rapaza do pobo sotho en rematar secundaria. En 1941 graduouse en Artes, na especialidade de Educación, pola Universidade de Fort Hare.
Foi mestra no Instituto Misioneiro de Lovedale (Suráfrica), onde tivo por alumna a Godfrey Kolisang. Despois ensinou na Escola Feminina de Thabana Morena e no Colexio de Morija. Despois casou con Bennett Makalo Khaketla, e xuntos ensinaron no Instituto Basutoland en Maseru, até que o centro foi pechado por actividades políticas. Entón foron traballar a Nigel, en Suráfrica. En 1953 o seu home regresou a Lesotho para iniciar unha carreira política, e 'Masechele regresou ao Insituto Basutoland.
Despois, cun colega, sacou adiante unha escola experimental de primaria, Iketsetseng ("facédeo vós mesmos/as"), que en 1988 tiña máis de cen alumnos e alumnas. Nese centro estudaron a futura raíña 'Mamohato de Lesotho e o seu fillo, Letsie III. Khaketla perdeu o control do centro en 1992, e abriu outra escola na súa propia casa.
Khaketla escribiu once libros, incluíndo poemarios, en lingua sesotho. En 1979 converteuse na primeira muller sotho en ser nomeada asesora na Corte Suprema do seu país. Formou parte do consello da Universidade Nacional de Lesotho e traballou para o goberno no comité especial do estado da muller para a Comisión de Reforma Lexislativa. Foi membro activo da Comuñón Anglicana e da súa Mothers' Union.
En 1983 foi a primeira persoa sotho en doutorarse en literatura pola Universidade Nacional. En 1997 recibiu o premio Gold Record of Achievement do American Biographical Institute. Khaketla tivo seis fillos e fillas, entre elas 'Mamphono Khaketla. Despois da súa morte o seu funeral celebrouse na Catedral de Santa María e Santiago de Maseru, e foi enterrada no cemiterio de Kokobela.
Obras 'Mantsopa le Molamu oa Kotjane Mosiuoa Masilo Mosali eo o 'Neileng Eena Pelo ea Monna Ka u Lotha Mahlopha a Senya Ho Isa Lefung Molekane ea Tsoanang le Eena Khotsoaneng Selibelo sa Nkhono Maoelana a hlompho (2002)
Notas
Categoría:Nados en 1918 Categoría:Nados en Lesotho Categoría:Finados en 2012 Categoría:Escritores de Lesotho Categoría:Profesores Categoría:Escritores en lingua sesotho Categoría:Profesores da Universidade Estatal de Lesotho Categoría:Alumnos da Universidade de Fort Hare Categoría:Personalidades sen imaxes