Primula minima — вид цветно растение кое припаѓа на родот Primula, од семејството Јаглики (Primulaceae). Негово природно живеалиште се планинските предели на источниот дел од Алпите, Карпатите и Балканот. Иако е вид што живее на висока надморска височина, тоа повеќе од очекуваното се потпира на ширењето преку семе отколку на клонското (вегетативното) размножување. Опис и распространетост Primula minima е повеќегодишно многу ниско тревесто растение, високо 3–5 см, со ситни и ретки жлездести влакненца на листовите, нивните рабови и на чашката. Листовите на ова растение се зелени и сјајни, со цврста и кожаста структура. Неговата форма е стеснета при основата, а поширока кон врвот (како клин или превртен триаголник). Врвот на листот има од 5 до 9 запци, а секој забец завршува со мал, цврст 'рскавичен шилест додаток. Кон основата, листот постепено се стеснува и преминува во кратка, но широка лисна дршка. Соцветното стебло е долго од 2 до 8 мм и носи еден, поретко два цвета. Брактеите се 1-2 на број, со должина од 2 до 6 мм (пократки од чашката), додека самите цветни дршки се исклучително кратки, до 3 мм. Чашката е долга 5–7 мм, засечена до половина, со делови издолжени и тапи, прилепени до венечната трубичка (цевка). Венчето е светло розово, со дијаметар 1,5–3 см; цевката е долга 5–11 мм, белузлава, 1–2 пати подолга од чашката, со жлездести влакненца во грлото; слободните делови се засечени до една третина од врвот. Плодната кутијка е долга 3–5 мм и стигнува до половина од должината на чашката. Семките имаат мазна површина.
Во Македонија расте на длабоки почви во високопланински пасишта. Се среќава единствено на Шар Планина, кај Љуботен.
Галерија
Наводи
Категорија:Растенија опишани во 1753 година Категорија:Растителни таксони опишани од Карл Линеј Категорија:Флора на Алпите Категорија:Флора на Македонија Категорија:Флора на Европа