Trifolium hirtum, попозната како розова детелина, — едногодишен вид на детелина опишан од Карло Алиони. Потекнува од Евроазија и Северна Африка, а е доведен вид и се одгледува и на други места.
Опис Растението е едногодишно, високо до 40 см, разгрането и со странично раширени гранчиња. Стеблото е исправено, цврсто и по површината покриено со куси и долги раширени влакна. Базалните листови имаат дршки два до три пати подолги од листната плочка, додека кај најгорните листови дршките се покуси од листната плочка. Лисните дршки се густо покриени со раширени влакна. Листовите се обратнојајцевидни, долги 10–20 мм, од двете страни покриени со полураширени влакна и со јасно испакнати жили. Врвот е тап и заоблен, а работ ситно назабен. Прилисниците се копјести, белузлави, со испакнати зелени жили, а нивниот слободен дел постепено преминува во долг, тенок, зелен и заострен врв.
Соцветијата се топчести, со пречник од 20–25 мм, густо влакнести и составени од голем број збиени цветови. Во основата се обвиени од проширените јајцевидни прилисници на еден или два листа.
Чашката е долга 10–11 мм. Нејзиниот трубест дел е долг околу 3 мм, има дваесет жили и е покриен со густи полураширени влакна, а околу отворот има прстен од густи влакна. Запците се долги 8–9 мм, речиси еднакви по должина, тенко шиловидни и покриени со полураширени влакна. Венчето е пурпурно. Барјачето е долго 12–16 мм и широко околу 1–1,2 мм, со заострен врв благо закривен нагоре. Крилцата се исто така заострени и околу 4 мм покуси од барјачето, а лаѓичката има заострен врв и е малку покуса од крилцата. Плодот е мала мешунка сместена во чашката, која обично содржи едно семе.
Распространетост во светот Домороден на Европа, Западна Азија и Северна Африка, T. hirtum е доведен вид и во други региони, вклучувајќи ја и Северна Америка. Во Соединетите Американски Држави, тој бил доведен во Калифорнија од Турција во 1940-тите, првично како фуражна култура за поддршка на сточарското земјоделство. Денес, тој е станат широко распространет плевел покрај патот во Калифорнија, понекогаш сметан за инвазивен, добро прилагодувајќи се на локалната клима и почвените услови.
Распространетост во Македонија Trifolium hirtum расте по брдски пасишта, камењари, покрај грмушести растенија и проретчени шуми до надморска височина од 1500 метри, растението е широко распространето на скоро цела територија на Македонија до соодветната височина, но претежно во пониските предели.
Екологија Иако Trifolium hirtum има придобивки како покривна култура и сточна храна, неговото воведување во неавтохтони области понекогаш доведува до тоа да стане инвазивно, потенцијално нарушувајќи ги локалните екосистеми и надвладувајќи ги автохтоните растителни видови. Затоа во некои случаи потребни се практики за управување за да се контролира неговото ширење во одредени контексти.
Одгледување и употреба Розовата детелина често се одгледува како покривна култура, обезбедувајќи разни еколошки придобивки како што се стабилизација на почвата и врзување на азот поради нејзината мешункаста природа. Исто така, се користи како добиточна храна, особено за хранење на добитокот како што се говедата и овците. Сепак, нејзиното широко распространето усвојување довело до тоа да стане инвазивна во некои области, надвладувајќи ја локалната флора.
Галерија
Наводи
Надворешни врски
Категорија:Детелина Категорија:Сточна храна Категорија:Флора на Европа Категорија:Флора на Македонија Категорија:Флора на Азија Категорија:Флора на Африка Категорија:Таксони именувани од Карло Алиони