Малайскі мядзведзь — арт."Малайзія" (Helarctos malayanus) — від млекакормячых з сямейства мядзведзевыя, які з’яўляецца адзіным відам манатыпічнага роду малайскіх мядзведзяў.
Апісанне Малайскі мядзведзь — самы дробны прадстаўнік сямейства мядзведзяў (у 10 разоў меншы за белага і крыху большы за дзіцяня барыбала): у даўжыню ён не перавышае 1,5 м (плюс 3-7 см хвост), вышыня ў карку — 50-70 см; маса 27-65 кг. Самцы на 10-20 % буйнейшы за самак. Каржакаватая, моцная жывёла з кароткай і шырокай хмызай. Вушы кароткія, круглявыя. Канечнасці высокія з неадпаведна вялікімі лапамі; кіпцюры вельмі буйныя, выгнутыя. Ступні голыя. Іклы невялікія; карэнныя зубы небуйныя, сплошчаныя. Адметнай рысай, звязанай з харчаваннем насякомымі, з’яўляецца доўгі язык.
Поўсць малайскага мядзведзя кароткая, цвёрдая і гладкая. Афарбоўка чорная, на хмызе пераходзіць у чала-жоўтую. Часам светла-бурымі бываюць і канечнасці. На грудзях звычайна прысутнічае вялікая бялёсая або рудая пляма ў выглядзе падковы, якая нагадвае па форме і колеру ўзыходзячае сонца (адсюль навуковая назва роду — Helarctos, «сонечны мядзведзь»).
Арэал Распаўсюджаны ад паўночнага ўсходу Індыі (Асам) і, магчыма, паўднёвай часткі Кітая (Сычуань) праз М’янму, Тайланд, паўвострава Індакітай і Малака да Інданезіі (Суматра і Калімантан). На востраве Калімантан жыве падвід Helarctos malayanus euryspilus.
Катэгорыя:Мядзведзевыя